കായികക്ഷമതാ പരീക്ഷ തോറ്റ ബോഡി ബിൽഡർക്ക് വീണ്ടും അവസരം? തിരുകിക്കയറ്റാൻ പുതിയ നീക്കം
തിരുവനന്തപുരം: കേരള പൊലീസിൽ ഇൻസ്‌പെക്ടർ നിയമനത്തിനുള്ള കായിക പരീക്ഷ തോറ്റ ബോഡിബിൽഡിംഗ് താരം ഷിനു ചൊവ്വയ്ക്ക് വീണ്ടും അവസരം നൽകാൻ നീക്കം നടക്കുന്നതായി സൂചന. ഷിനുവിന്റെ അപേക്ഷ പരിഗണിച്ചാണ് പുതിയ നീക്കത്തിനുള്ള ശ്രമം. ബോഡി ബിൽഡിംഗ് താരമായ ഷിനുവിന് മന്ത്രിസഭയാണ് നിയമന ശുപാർശ നൽകിയത്. ഇന്ന് രാവിലെ നടത്തിയ കായികക്ഷമതാ പരീക്ഷയിൽ ഷിനു പരാജയപ്പെട്ടിരുന്നു. പിന്നാലെയാണ് വീണ്ടും അവസരം നൽകാനുള്ള നീക്കം നടത്തുന്നത്.
പേരൂർക്കട എസ്എപി ഗ്രൗണ്ടിലാണ് കായികക്ഷമതാ പരീക്ഷ നടന്നത്. 100 മീറ്റർ ഓട്ടം, ലോംഗ് ജംപ്, ഹൈജംപ്, 1500 മീറ്റർ ഓട്ടം എന്നീ ഇനങ്ങളിലാണ് ഷിനു പരാജയപ്പെട്ടത്. മന്ത്രിസഭാ നിയമന ശുപാർശ നൽകിയ മറ്റൊരു ബോഡിബിൽഡിംഗ് താരമായ ചിത്തരേശ് നടേശൻ പരീക്ഷയിൽ പങ്കെടുത്തില്ല.
അതേസമയം, ഒളിമ്പിക്സിലും ദേശീയ ഗെയിംസിലും അംഗീകരിച്ചിട്ടുള്ള കായിക ഇനങ്ങളിൽ മെഡലുകൾ നേടിയ താരങ്ങൾക്കാണ് സ്‌പോർട്സ് ക്വാട്ടയിൽ സംസ്ഥാന പൊലീസ് സേനയിൽ നിയമനം നൽകുന്നത്. ഇത് മറികടന്നെടുത്ത മന്ത്രിസഭ തീരുമാനത്തിനെതിരെ വിമർശനങ്ങൾ ശക്തമായിരുന്നു. ദേശീയ അന്തർദേശീയ തലത്തിൽ രണ്ടുപേരുമുണ്ടാക്കിയ നേട്ടവും കുടുംബപശ്ചാത്തലവും പരിഗണിച്ച് നിയമനം നൽകുന്നുവെന്നായിരുന്നു ഉത്തരവിൽ പറഞ്ഞിരുന്നത്.
ചട്ടങ്ങളിൽ ഇളവ് വരുത്തി സൂപ്പർന്യൂമറി തസ്തിക സൃഷ്ടിച്ചാണ് നിയമനം നൽകാൻ നീക്കം നടന്നത്. അന്തർദേശീയ ദേശീയ തലങ്ങളിൽ മെഡലുകൾ കരസ്ഥമാക്കിയ താരങ്ങൾ നിയമനത്തിനായി കാത്തുനിൽക്കുമ്പോഴാണ് ചട്ടവിരുദ്ധനിയമന നീക്കം നടന്നത്.
Source link
