വളർച്ച കുത്തനെ കുറഞ്ഞു, ആരോഗ്യ ഇൻഷുറൻസ് മേഖലയ്ക്ക് ക്ഷീണം

ന്യൂഡൽഹി ∙ കോവിഡിനു ശേഷം ആദ്യമായി വളർച്ച കുത്തനെ കുറഞ്ഞ് ആരോഗ്യ ഇൻഷുറൻസ് മേഖല. ജനറൽ ഇൻഷുറൻസ് കൗൺസിലിന്റെ കണക്കുപ്രകാരം 10.44% വരുമാനത്തിന്റെ കുറവാണ് ആരോഗ്യ ഇൻഷുറൻസ് മേഖലയിലുണ്ടായത്. 2025 ജനുവരിയിൽ അവസാനിച്ച വർഷത്തെ കണക്കാണിത്. 2024 ജനുവരിയിൽ 20.79%, 2023 ൽ 23.57%, 2022 ൽ 25.89% എന്നിങ്ങനെ വളർച്ച രേഖപ്പെടുത്തിയ മേഖലയാണ് കഴിഞ്ഞ വർഷം കൂപ്പുകുത്തിയത്.വർധിച്ചുവരുന്ന പണപ്പെരുപ്പവും വരുമാനത്തിലെ സ്തംഭനവും ഉപഭോക്താക്കളെ അവശ്യ ചെലവുകൾക്ക് മുൻഗണന നൽകാൻ നിർബന്ധിതരാക്കുന്നെന്നും ആരോഗ്യ ഇൻഷുറൻസ് ഉൾപ്പെടെയുള്ള വിവേചനാധികാര ചെലവുകൾ വെട്ടിക്കുറയ്ക്കുകയാണ് ആളുകളെന്നും ജിഐ കൗൺസിൽ റിപ്പോർട്ടിൽ പറയുന്നു. രാജ്യത്തെ ജനസംഖ്യയുടെ സിംഹഭാഗവും ആരോഗ്യ ഇൻഷുറൻസ് വാങ്ങുന്നത് വൈകിപ്പിക്കുകയോ പൂർണമായും ഒഴിവാക്കുകയോ ചെയ്യുകയാണ്.


Source link