ശബരിമല നട 12ന് തുറക്കും

പത്തനംതിട്ട: കുംഭമാസ പൂജകൾക്കായി ശബരിമല നട ഫെബ്രുവരി 12ന് വൈകിട്ട് 5ന് തുറക്കും. തന്ത്രി കണ്ഠരര് രാജീവരുടെ സാന്നിദ്ധ്യത്തിൽ മേൽശാന്തി എസ്.അരുൺ കുമാർ നമ്പൂതിരി നടതുറന്ന് ശ്രീലകത്ത് ദീപം തെളിക്കും. തുടർന്ന് പതിനെട്ടാംപടി ഇറങ്ങി ആഴിയിൽ അഗ്നി ജ്വലിപ്പിക്കും. തുടർന്ന് ഭക്തർക്ക് പതിനെട്ടാംപടി കയറാം. അന്ന് പ്രത്യേക പൂജകളില്ല. 13ന് പുലർച്ചെ 5ന് നടതുറന്ന് നിർമ്മാല്യ ദർശനവും പതിവ് അഭിഷേകവും കിഴക്കേ മണ്ഡപത്തിൽ തന്ത്രിയുടെ കാർമ്മികത്വത്തിൽ ഗണപതിഹോമവും നടത്തും. തുടർന്ന് നെയ്യഭിഷേകം,അഷ്ടാഭിഷേകം,ഉഷഃപൂജ, ഉദയാസ്തമന പൂജ,കളഭാഭിഷേകം,പടിപൂജ,പുഷ്പാഭിഷേകം. കുംഭമാസ പൂജകൾ പൂർത്തിയാക്കി 17ന് രാത്രി 10ന് നട അടയ്ക്കും. ദർശനത്തിന് വെർച്വൽ ക്യൂ വെബ്സൈറ്റ് വഴിയുള്ള ബുക്കിംഗ് ആരംഭിച്ചു. സ്പോട്ട് ബുക്കിംഗിലൂടെയും ദർശനം നടത്താം.