ഷാഫി ഇനി നോവോർമ്മ

കൊച്ചി: മലയാളികളെ ചിരിപ്പിച്ച പ്രിയ സംവിധായകൻ ഷാഫിക്ക് (56)​ കേരളം വിട നൽകി. മൃതദേഹം ഞായറാഴ്ച വൈകിട്ട് മൂന്നിന് കലൂർ ജുമാ മസ്ജിദ് കബർസ്ഥാനിൽ കബറടക്കി. വിവിധ മേഖലകളിലെ പ്രമുഖർ അന്തിമോപചാരമർപ്പിച്ചു.

മസ്തി​ഷ്കാഘാതത്തെ തുടർന്ന് 26ന് പുലർച്ചെ 12.25നായിരുന്നു അന്ത്യം. ഭൗതികദേഹം പുലർച്ചെ രണ്ടോടെ ആസ്റ്റർ മെഡ്‌സിറ്റിയിൽ നിന്ന് ഇടപ്പള്ളി​യിലെ വീട്ടിലെത്തിച്ചു. തുടർന്ന് രാവിലെ 10 മുതൽ ഉച്ചയ്‌ക്ക് ഒന്നു വരെ കലൂർ മണിപ്പാട്ടി​ പറമ്പിലെ സഹകരണ ബാങ്ക് ഹാളിൽ പൊതുദർശനത്തിന് വച്ചു.

കേന്ദ്രമന്ത്രി സുരേഷ് ഗോപി, മന്ത്രി പി. രാജീവ്, ചലച്ചിത്ര താരങ്ങളായ മമ്മൂട്ടി, എം. മുകേഷ് എം.എൽ.എ,​ ദിലീപ്, പൃഥ്വിരാജ്, മനോജ് കെ. ജയൻ, ഹരിശ്രീ അശോകൻ, സലിം കുമാർ, അബു സലിം, ഷാജോൺ, രമേഷ് പിഷാരടി, നവ്യ നായർ, നമിത പ്രമോദ്‌, പൊന്നമ്മ ബാബു, വിനീത് കുമാർ, സൈജു കുറുപ്പ്, ഉണ്ണിമായ പ്രസാദ്, സംവിധായകരായ സിബി മലയിൽ, ബി. ഉണ്ണിക്കൃഷ്ണൻ, വിനയൻ,​ തിരക്കഥാകൃത്തുക്കളായ ബെന്നി പി. നായരമ്പലം, ശ്യാംപുഷ്‌കരൻ തുടങ്ങിയവർ അന്തിമോപചാരമർപ്പിച്ചു.