പനയമ്പാടം അപകടം ; ലോറി ഡ്രൈവർമാരെ റിമാൻഡ് ചെയ്തു, നരഹത്യക്ക് കേസെടുത്തു
പാലക്കാട് : പനയമ്പാടം അപകടത്തിൽ ലോറി ഡ്രൈവർമാരെ രണ്ടാഴ്ചത്തേക്ക് റിമാൻഡ് ചെയ്തു.
വഴിക്കടവ് സ്വദേശി പ്രജീഷ് ജോൺ (27), കാസർകോ‌ട് സ്വദേശി മഹീന്ദ്രപ്രസാദ് എന്നിവരെയാണ് റിമാൻഡ് ചെയ്തത്. അപകടത്തിന് കാരണമായ ലോറി ഡ്രൈവർ പ്രജീഷ്, കുട്ടികളുടെ മുകളിലേക്ക് മറിഞ്ഞ ലോറിയുടെ ഡ്രൈവർ മഹീന്ദ്രപ്രസാദ് എന്നിവരെയാണ് മണ്ണാർക്കോട് കോടതി റിമാൻഡ് ചെയ്തത്.
പനയമ്പാടം അപകടം തനിക്ക് പറ്റിയ പിഴവാണെന്ന് ലോറി ഡ്രൈവർ പ്രജീഷ് സമ്മതിച്ചതായി പൊലീസ് പറഞ്ഞു. ഒരു ബൈക്ക് കുറുകെ ചാടി. അത് ശ്രദ്ധിക്കാതെ പോയപ്പോഴുള്ള പിഴവാണ് അപകടകാരണമെന്നാണ് മൊഴി. പ്രജീഷ് ജോണിനെതിരെ നേരത്തെ തന്നെ നരഹത്യ ചുമത്തിയിരുന്നു. പ്രജീഷ് ഓടിച്ച ലോറി സിമന്റ് ലോറിയിൽ തട്ടുകയായിരുന്നു. ഇതോടെ നിയന്ത്രണം നഷ്ടപ്പെട്ട് സിമന്റ് ലോറി മറിഞ്ഞു. സിമന്റ് ലോറി ഡ്രൈവർ മഹീന്ദ്ര പ്രസാദിനെതിരെയും നരഹത്യയ്ക്ക് കേസെടുത്തു. ദൃക്സാക്ഷി മൊഴിയുടെ അടിസ്ഥാനത്തിലാണ് നടപടി. ലോറി അപകടം നടന്ന സ്ഥലത്ത് ഇന്ന് ഫോറൻസിക് വിദഗ്ദ്ധരുടെ നേതൃത്വത്തിൽ പരിശോധന നടന്നു. അമിതവേഗതയിൽ വാഹനമോടിച്ച് അപകടമുണ്ടാക്കിയതിനും കുറ്റകരമായ നരഹത്യാക്കുറ്റം ചുമത്തിയുമാണ് കേസെടുത്തിട്ടുള്ളതെന്ന് ഡിവൈ.എസ്.പി പറഞ്ഞു. അപകടത്തിൽ ഇരുവർക്കും പരിക്കേറ്റിരുന്നു. ചികിത്സയ്ക്കുശേഷം സുഖംപ്രാപിച്ച ഇരുവരേയും അറസ്റ്റ് ചെയ്യുകയായിരുന്നു.
കരിമ്പ ഹയർ സെക്കൻഡറി സ്‌കൂളിലെ എട്ടാം ക്ലാസ് വിദ്യാർത്ഥിനികളാണ് ഇന്നലെ ദാരുണമായി മരിച്ചത്. ഇന്നലെ വൈകിട്ട് നാല് മണിയോടെയാണ് അപകടമുണ്ടായത്. നടന്നുവരികയായിരുന്ന കുട്ടികളുടെ മുകളിലേക്ക് സിമന്റ്ലോറി മറിയുകയായിരുന്നു. പള്ളിപ്പുറം വീട്ടിൽ അബ്ദുൽ സലാംഫാരിസ ദമ്പതികളുടെ മകൾ ഇർഫാന ഷെറിൻ, പെട്ടേത്തൊടിയിൽ വീട്ടിൽ അബ്ദുൽ റഫീഖ്ജസീന ദമ്പതികളുടെ മകൾ റിദ ഫാത്തിമ്മ, കവുളേങ്ങൽ വീട്ടിൽ അബ്ദുൽ സലീം നബീസ ദമ്പതികളുടെ മകൾ നിദ ഫാത്തിമ്മ, അത്തിക്കൽ വീട്ടിൽ ഷറഫുദ്ദീൻസജ്ന ദമ്പതികളുടെ മകൾ ആയിഷ എന്നിവരാണ് മരിച്ച വിദ്യാർത്ഥിനികൾ.
Source link
