പതിവുതെറ്റിച്ചില്ല: ഗ്യാസ് വില അഞ്ചാംമാസവും കാര്യമായി കൂട്ടി; വാണിജ്യസിലിണ്ടറിന്റെ കേരളത്തിലെ വില അറിയാം

കൊച്ചി: രാജ്യത്ത് വാണിജ്യാവശ്യത്തിന് ഉപയോഗിക്കുന്ന പാചകവാതക സിലിണ്ടറിന് വില കൂട്ടി. തുടർച്ചയായ അഞ്ചാംമാസമാണ് വില കൂട്ടുന്നത്. 19 കിലോഗ്രാം സിലിണ്ടറിന് 16 രൂപയാണ് ഇന്ന് വർദ്ധിപ്പിച്ചത്. ഇതോടെ അഞ്ച് മാസത്തിനിടെ 173.5 രൂപയാണ് വിലയിൽ വർദ്ധനവുണ്ടായത്. എന്നാൽ ഗാർഹികാവശ്യത്തിനുള്ള സിലിണ്ടർ വിലയിൽ മാ​റ്റമുണ്ടായിട്ടില്ല.

1827 രൂപയാണ് കേരളത്തിൽ 19 കിലോ സിലിണ്ടറിന്റെ പുതിയ വില. ചെന്നൈയിൽ 1980.5 രൂപയായി. ഗ്യാസ് വില കൂടിയതോടെ ഹോട്ടലുകാർ ഭക്ഷണസാധനങ്ങൾക്കുള്ള വിലയും കൂട്ടിയേക്കും. അവശ്യവസ്തുക്കളുടെ വില വർദ്ധനയുടെ പേരുപറഞ്ഞ് ചില ഹോട്ടലുകൾ അമിത വില ഈടാക്കുന്നുവെന്ന് ഇപ്പോൾ തന്നെ പരാതിയുണ്ട്.