യുക്രൈനെ ഇരുട്ടിലാക്കി റഷ്യ; വൈദ്യുതിവിതരണ ശൃംഖലയ്ക്കുനേരേ കനത്ത മിസൈല് ആക്രമണം
![](https://i0.wp.com/www.onlinekeralanews.com/wp-content/uploads/2024/11/ukraine-electricity.jpg?resize=780%2C470&ssl=1)
കീവ്: യുക്രൈനെ ഇരുട്ടിലാക്കി റഷ്യയുടെ കനത്ത മിസൈല് ആക്രമണം. യുക്രൈനിലെ വൈദ്യുതിവിതരണ ശൃംഖലയ്ക്കുനേരേ റഷ്യ നടത്തിയ രൂക്ഷമായ മിസൈല് ആക്രമണമാണ് രാജ്യത്തെ വൈദ്യുതി വിതരണം പ്രതിസന്ധിയിലാക്കിയത്. രാജ്യത്തെ ഊര്ജവിതരണ സംവിധാനങ്ങളെ ലക്ഷ്യമിട്ടാണ് റഷ്യ ആക്രമണം നടത്തുന്നതെന്നും നൂറോളം ഡ്രോണുകളും 90-ലധികം മിസൈലുകളും ഉപയോഗിച്ചാണ് രാജ്യത്തെ വിവിധഭാഗങ്ങളില് റഷ്യ ആക്രമണം നടത്തിയതെന്നും യുക്രൈന് പ്രസിഡന്റ് വൊളോദിമര് സെലന്സ്കി പറഞ്ഞു. അതേസമയം, മിസൈല് ആക്രമണത്തെക്കുറിച്ച് റഷ്യ ഇതുവരെ പ്രതികരിച്ചിട്ടില്ല. കീവ്, ഒഡേസ, ഖാര്കീവ് തുടങ്ങിയ നഗരങ്ങളിലാണ് മിസൈല് ആക്രമണമുണ്ടായതെന്നാണ് റിപ്പോര്ട്ട്. ഏകദേശം ഒമ്പതരമണിക്കൂറോളം ആക്രമണം നീണ്ടുനിന്നതായും റിപ്പോര്ട്ടുകളില് പറയുന്നത്. യുക്രൈനിലെ 12 മേഖലകളെയെങ്കിലും മിസൈല് ആക്രമണം ബാധിച്ചിട്ടുണ്ടെന്നും അതിനാല് അടിയന്തരമായി വൈദ്യുതിമുടക്കം ഏര്പ്പെടുത്തിയിട്ടുണ്ടെന്നും യുക്രൈന് ഊര്ജവിതരണ വകുപ്പ് മന്ത്രി ഹെര്മന് ഹാലുഷ്ചെങ്കോ അറിയിച്ചു. തങ്ങളുടെ ഊര്ജവിതരണ സംവിധാനത്തെയാണ് റഷ്യ ലക്ഷ്യമിടുന്നതെന്ന് സംഭവത്തിന് പിന്നാലെ യുക്രൈന് പ്രസിഡന്റ് വൊളോദിമര് സെലന്സ്കിയും ടെലിഗ്രാമിലൂടെ പ്രതികരിച്ചു.
Source link