വയനാട് ടൗൺഷിപ്പ്: ഹർജികൾ മാറ്റി

കൊച്ചി: വയനാട് ഉരുൾപൊട്ടൽ ദുരന്തബാധിതരുടെ പുനരധിവാസത്തിന് മോഡൽ ടൗൺഷിപ്പ് നിർമ്മിക്കാൻ സർക്കാർ കണ്ടെത്തിയ ഭൂമി ഏറ്റെടുക്കുന്നതിനെതിരെ എസ്റ്റേറ്റ് ഉടമകൾ നൽകിയ ഹർജികൾ ഹൈക്കോടതി 26ലേക്ക് മാറ്റി. എൽസ്റ്റോൺ ടീ എസ്റ്റേറ്റും ഹാരിസൺസ് മലയാളം ലിമിറ്റഡും നൽകിയ ഹർജികളാണ് ജസ്റ്റിസ് കൗസർ എടപ്പഗത്തിന്റെ പരിഗണനയിലുള്ളത്.

കോടതി ആവശ്യപ്പെട്ടാൽ ഏറ്റെടുക്കുന്ന എസ്റ്റേറ്റുകളുടെ മൂല്യം കണക്കാക്കി നഷ്ടപരിഹാരത്തുക സിവിൽ കേസിലെ തീർപ്പിന് വിധേയമായി കോടതിയിൽ കെട്ടിവയ്‌ക്കാൻ തയ്യാറാണെന്ന് സർക്കാർ അറിയിച്ചിട്ടുണ്ട്. ഏറ്റെടുക്കുന്ന ഭൂമിയുടെ മുഴുവൻ തുകയും ഉടൻ ലഭിക്കണമെന്നാണ് ഹർജിക്കാരുടെ ആവശ്യം. നഷ്ടപരിഹാരത്തുക സംബന്ധിച്ച് ധാരണയിലെത്താൻ ഹൈക്കോടതി കക്ഷികൾക്ക് നിർദ്ദേശം നൽകി. ഇതുസംബന്ധിച്ച വിശദാംശങ്ങൾ അറിയിക്കാനാണ് ഹർജികൾ മാറ്റിയത്. നെടുമ്പാല എസ്റ്റേറ്റിലെ 65.41 ഹെക്ടറും കൽപ്പറ്റ എൽസ്റ്റോൺ എസ്റ്റേറ്റിലെ 78.73 ഹെക്ടറും ഭൂമിയുമാണ് ഏറ്റെടുക്കേണ്ടത്.