ജോലിക്കാരിയെ പീഡിപ്പിച്ച കേസിൽ ഹോർട്ടികോർപ്പ് മുൻ എം.ഡി കീഴടങ്ങി

കൊച്ചി: വീട്ടുജോലിക്കാരിയായ ഒഡീഷ സ്വദേശിനിയെ പീഡിപ്പിച്ച കേസിൽ ഒളി​വി​ലായി​രുന്ന ഹോർട്ടികോർപ്പ് മുൻ മാനേജിംഗ് ഡയറക്ടർ കെ. ശിവപ്രസാദ് (78) ഇന്നലെ പൊലീസി​ൽ കീഴടങ്ങി​. രാവി​ലെ എറണാകുളം സൗത്ത് എ.സി​.പി ഓഫീസി​ൽ ഹാജരാവുകയായി​രുന്നു. പിന്നാലെ കുഴഞ്ഞുവീണ ശിവപ്രസാദിനെ മെഡി​ക്കൽ ട്രസ്റ്റ് ആശുപത്രി​യി​ലെ ഐ.സി​.യുവി​ൽ പ്രവേശി​പ്പി​ച്ചെങ്കിലും വൈകിട്ട് മുറി​യി​ലേക്ക് മാറ്റി​.

മുൻകൂർ ജാമ്യാപേക്ഷ കോടതി തള്ളിയതി​നെ തുടർന്നാണ് ഒരു മാസത്തോളം ഒളി​വി​ൽ കഴി​ഞ്ഞ ശേഷം കീഴടങ്ങിയത്. പൊലീസ് ലുക്ക് ഔട്ട് നോട്ടീസ് ഇറക്കി​യി​രുന്നു.

ഒക്ടോബർ 15നാണ് ജ്യൂസിൽ ലഹരി ചേർത്ത് നൽകി പട്ടി​കവർഗ വി​ഭാഗത്തി​ൽപ്പെട്ട 22കാരി​യെ പീഡി​പ്പി​ച്ചത്. അബോധാവസ്ഥയി​ലായതി​നാൽ എന്താണ് സംഭവിച്ചതെന്ന് അറിയില്ലെന്ന് യുവതി സുഹൃത്തി​നെ അറിയിച്ചതോടെയാണ് സംഭവം വെളി​ച്ചത്തായത്. പൊലീസ് യുവതിയെ വൈദ്യപരിശോധനയ്ക്ക് വിധേയമാക്കി​യപ്പോൾ പീഡനം വ്യക്തമായി. ശിവപ്രസാദ് പീഡിപ്പിച്ചതായി പിന്നീട് യുവതി​ മൊഴി നൽകി.

ഫാമിംഗ് കോർപ്പറേഷൻ, പ്ലാന്റേഷൻ കോർപ്പറേഷൻ തുടങ്ങി​യവ ഉൾപ്പെടെ നിരവധി സർക്കാർ പൊതുമേഖലാ സ്ഥാപനങ്ങളിൽ ഉന്നത പദവിയിലിരുന്ന വ്യക്തിയാണ് ശിവപ്രസാദ്. ദേശീയ പട്ടികവർഗ കമ്മി​ഷൻ സ്വമേധയാ കേസ് എടുത്തിരുന്നു.