പാലക്കാട്: തേങ്കുറിശ്ശി ദുരഭിമാനക്കൊലക്കേസിൽ പ്രതികൾക്ക് ജീവപര്യന്തം തടവും അരലക്ഷം രൂപ പിഴയും ശിക്ഷ വിധിച്ചു. പിഴത്തുക കൊല്ലപ്പെട്ട അനീഷിന്റെ ഭാര്യ ഹരിതയ്ക്കു നൽകണം. ഇലമന്ദം കുമ്മാണി ചെറുതുപ്പല്ലൂർ സുരേഷ്(49), തേങ്കുറുശ്ശി ഇലമന്ദം കുമ്മാണി ചെറുതുപ്പല്ലൂർ പ്രഭുകുമാർ (43)എന്നിവരെയാണ് കുറ്റക്കാരെന്നുകണ്ട് പാലക്കാട് അഡിഷണൽ സെഷൻസ് കോടതി ഒന്ന് ജഡ്ജി ആർ.വിനായകറാവു ശിക്ഷിച്ചത്. യാതൊരു കൂസലുമില്ലാതെ ചിരിച്ചുകൊണ്ടാണ് പ്രതികൾ കോടതിവിധി കേട്ടത്. കൊലപാതകം, ഭീഷണിപ്പെടുത്തൽ, തെളിവ് നശിപ്പിക്കൽ, ഗൂഢാലോചന എന്നീ കുറ്റങ്ങളാണ് പ്രതികൾക്കെതിരെ ചുമത്തിയിരുന്നത്.
2020 ഡിസംബർ 25നാണ് കേസിനാസ്പദമായ സംഭവം. സാമ്പത്തികമായി മുന്നാക്കം നിൽക്കുന്ന രണ്ടാം പ്രതി പ്രഭുകുമാറിന്റെ മകൾ ഹരിത താഴ്ന്ന ജാതിയിൽപ്പെട്ട, സാമ്പത്തികമായി പിന്നാക്കം നിൽക്കുന്ന അനീഷിനെ പ്രണയിച്ച് വിവാഹം കഴിച്ചതിലുള്ള ദുരഭിമാനവും വൈരാഗ്യവുമാണ് കൊലപാതകത്തിൽ കലാശിച്ചത്. ഡിസംബർ 25ന് വൈകിട്ട് മാനാംകുളമ്പ് എൽ.പി സ്‌കൂളിനു സമീപം വച്ച് പ്രതികൾ മാരകായുധംകൊണ്ട് അടിച്ചും കത്തികൊണ്ട് കുത്തി പരിക്കേൽപ്പിച്ചും അനീഷിനെ കൊലപ്പെടുത്തിയെന്നാണ് കേസ്.
ഹരിതയുടെ മൊഴിയാണ് കേസിൽ നിർണായകമായത്. കേസിൽ ഇതുവരെയും പ്രതികൾ ജാമ്യത്തിലിറങ്ങിയിരുന്നില്ല. ഒരിക്കൽ മാത്രമാണ് ജാമ്യാപേക്ഷ നൽകിയത്. അത് കോടതി തള്ളുകയും ചെയ്തിരുന്നു. അതിനുശേഷം ഇതുവരെയും പ്രതികൾ ജാമ്യാപേക്ഷ നൽകിയിട്ടില്ല. 110 സാക്ഷികളിൽ 59 പേരെയാണ് വിസ്തരിച്ചത്. പ്രോസിക്യൂഷൻ 146 രേഖകൾ സമർപ്പിച്ച് 58 സാക്ഷികളെ വിസ്തരിച്ചു. പ്രോസിക്യൂഷനു വേണ്ടി ഗവ. പ്ലീഡർ പി.അനിൽ ഹാജരായി.
കുഴൽമന്ദം പൊലീസ് സബ് ഇൻസ്പെക്ടറായിരുന്ന അനൂപ് രജിസ്റ്റർ ചെയ്ത കേസ് അന്നത്തെ ആലത്തൂർ ഡിവൈ.എസ്.പി കെ.എം.ദേവസ്യയുടെ മേൽനോട്ടത്തിൽ പ്രാരംഭ അന്വേഷണം നടത്തി പ്രതികളെ അറസ്റ്റ് ചെയ്തിരുന്നു. അന്നത്തെ ഇൻസ്പെക്ടറായിരുന്ന രാമദാസ് അന്വേഷിച്ച കേസ് പിന്നീട് ജില്ല ക്രൈം ബ്രാഞ്ച് ഏറ്റെടുക്കുകയായിരുന്നു. ഡിവൈ.എസ്.പിമാരായ സി.സുന്ദരൻ, ഇമ്മാനുവൽ പോൾ, ജോൺ എന്നിവരാണ് തുടരന്വേഷണം നടത്തി 86 ദിവസത്തിനകം കുറ്റപത്രം സമർപ്പിച്ചത്.
കേസിന്റെ നാൾവഴി
2022 ജൂലായ് 21ന് കേസിന്റെ വിചാരണ പാലക്കാട് അഡിഷണൽ സെഷൻസ് കോടതിയിൽ ആരംഭിച്ചു
2022 ഡിസംബർ ഒന്നിന് അനീഷിന്റെ ഭാര്യ ഹരിതയുടെ തുടർപഠനത്തിന് 10 ലക്ഷം രൂപ സർക്കാർ അനുവദിച്ചു
2023 ജനുവരി 8ന് പ്രതികളിലൊരാളായ സുരേഷ് കുമാറിന്റെ ഭാര്യ വസന്തകുമാരി കോടതിയിൽ മൊഴിമാറ്റി
2024 ഒക്ടോബർ 25ന് രണ്ടു പ്രതികളും കുറ്റക്കാരെന്ന് കോടതി വിധിച്ചു
ജീവപര്യന്തം പോരാ, അപ്പീൽ പോകും:ഹരിത
തേങ്കുറിശ്ശി ദുരഭിമാനക്കൊല കേസിൽ പ്രതികൾക്ക് ജീവപര്യന്തം തടവ് വിധിച്ചതിൽ തൃപ്തയല്ലെന്നും വധശിക്ഷയാണ് നൽകേണ്ടതെന്നും അനീഷിന്റെ ഭാര്യ ഹരിത. ഇവർ ഇത്രയും വലിയ തെറ്റ് ചെയ്തിട്ടും ലഭിച്ച ശിക്ഷയിൽ താൻ തൃപ്തയല്ല. വധശിക്ഷ തന്നെ വേണമെന്നാണ് പ്രോസിക്യൂഷൻ വാദിച്ചത്. വിധിക്കെതിരെ അപ്പീലിന് പോകും.
കുറഞ്ഞപക്ഷം പ്രതികൾക്ക് ഇരട്ടജീവപര്യന്തമെങ്കിലും കിട്ടുമെന്നാണ് പ്രതീക്ഷിച്ചിരുന്നത്. ഈ ക്രൂരതയ്ക്ക് ഈ ശിക്ഷ പോരാ. വിചാരണ ഘട്ടത്തിൽ എന്നെയും കൊല്ലുമെന്ന തരത്തിൽ ഭീഷണികളൊക്കെ ഉണ്ടായിരുന്നു. പ്രതികൾ ജയിലിൽ നിന്നിറങ്ങിയാൽ ഭർത്താവിനെ കൊന്നപോലെ തന്നെയും കൊല്ലും. സർക്കാരിൽ പ്രതീക്ഷയുണ്ട്. സർക്കാരുമായി സംസാരിച്ച് അപ്പീലുമായി മുന്നോട്ടുപോകാൻ കഴിയുമെന്നാണ് പ്രതീക്ഷയെന്നും ഹരിത പറഞ്ഞു.
Source link