ചെന്നൈ: മാസപ്പടിക്കേസിൽ എസ്.എഫ്.ഐ.ഒ അഡിഷണൽ ഡയറക്ടർ പ്രസാദ് അഡെല്ലിയുടെ നേതൃത്വത്തിലുള്ള ആറംഗസംഘം നടത്തിവരുന്ന അന്വേഷണം അവസാനഘട്ടത്തിലേക്ക്. എട്ടുമാസത്തിനുള്ളിൽ റിപ്പോർട്ട് സമർപ്പിക്കാനായിരുന്നു നിർദ്ദേശം. ഇപ്പോൾ 10 മാസമായി.
കൊച്ചിൻ മിനറൽ ആൻഡ് റൂട്ടൈൽസ് (സി.എം.ആർ.എൽ.) കമ്പനി വീണാ വിജയന്റെ എക്സാലോജിക് സൊലൂഷ്യൻസ് കമ്പനിക്ക് നൽകാത്ത സേവനത്തിന് പ്രതിഫലം നൽകിയെന്ന ഇന്ററിം സെറ്റിൽമെന്റ് ബോർഡിന്റെ കണ്ടെത്തലാണ് കേസിനാധാരം. 2017 മുതൽ 2020 കാലയളവിൽ 1.72 കോടി രൂപ കൈപ്പറ്റിയെന്ന് ഇന്ററിം സെറ്റിൽമെന്റ് ബോർഡ് ചൂണ്ടിക്കാട്ടുന്നു.
വീണാ വിജയനെയും പിണറായി വിജയനെയും പാർട്ടിയെയും ഒരുപോലെ വെട്ടിലാക്കി. നിയമാനുസൃത കരാറെന്ന് മുഖ്യമന്ത്രി നിയമസഭയിലും രണ്ടു കമ്പനികൾ തമ്മിലുള്ള സുതാര്യമായ കരാറെന്ന് സി.പി.എം സംസ്ഥാന സെക്രട്ടേറിയറ്റ് പത്രക്കുറിപ്പിലും ന്യായീകരിച്ചിരുന്നു.
നാൾവഴി
2023 ഡിസംബർ 13: മാസപ്പടിക്കേസിൽ എക്സാലോജിക്കിനെതിരെ എസ്.എഫ്.ഐ.ഒ. അന്വേഷണം ആവശ്യപ്പെട്ട് ബി.ജെ.പി നേതാവ് ഷോൺ ജോർജ്ജിന്റെ ഹർജി ഹൈക്കോടതിയിൽ
2024 ജനുവരി 31: കേന്ദ്ര കമ്പനികാര്യ മന്ത്രാലയം എസ്.എഫ്.ഐ.ഒ അന്വേഷണം പ്രഖ്യാപിച്ചു
ഫെബ്രുവരി 2: കണക്കുകൾ ഹാജരാക്കാൻ വീണ വിജയന് എസ്.എഫ്.ഐ.ഒ നോട്ടീസ്
ഫെബ്രുവരി 5: ആലുവയിലെ സി.എം.ആർ.എൽ ഓഫീസിൽ എസ്.എഫ്.ഐ.ഒ പരിശോധന
ഫെബ്രുവരി 7: കെ.എസ്.ഐ.ഡി.സി ഓഫീസിൽ എസ്.എഫ്.ഐ.ഒ പരിശോധന
ഫെബ്രുവരി 24: എസ്.എഫ്.ഐ.ഒ അന്വേഷണത്തിനെതിരെ എക്സാലോജിക് സമർപ്പിച്ച ഹർജി കർണാടക ഹൈക്കോടതി തള്ളി
മാർച്ച് 12: അന്വേഷണം ചോദ്യം ചെയ്ത് കെ.എസ്.ഐ.ഡി.സി സമർപ്പിച്ച ഹർജിയിൽ അന്വേഷണം തുടരാൻ കേരള ഹൈക്കോടതി
മാർച്ച് 27: വീണയ്ക്കെതിരെ ഇ.ഡി കൊച്ചി യൂണിറ്റ് കള്ളപ്പണക്കേസ് രജിസ്റ്റർ ചെയ്യുന്നു
ഏപ്രിൽ 11: സി.എം.ആർ.എൽ ഉദ്യോഗസ്ഥരെ ഇ.ഡി ചോദ്യം ചെയ്യുന്നു
ഒക്ടോബർ 9: വീണയെ ചെന്നൈ എസ്.എഫ്.ഐ.ഒ ഓഫീസിൽ വിളിച്ചുവരുത്തി മൊഴി രേഖപ്പെടുത്തി
Source link