സംസ്ഥാനത്ത് വരുംദിവസങ്ങളിൽ ശക്തമായ മഴയ്‌ക്ക് സാദ്ധ്യത, ഇന്നത്തെ കാലാവസ്ഥ മുന്നറിയിപ്പ് അറിയാം

തിരുവനന്തപുരം: സംസ്ഥാനത്ത് ശക്തമായ മഴയ‌്ക്ക് സാദ്ധ്യത. ബംഗാൾ ഉൾക്കടലിൽ ന്യൂനമർദം രൂപമെടുത്താൽ വരും ദിവസങ്ങളിൽ ശക്തമായ മഴയ്‌ക്ക് സാദ്ധ്യതയുണ്ട്. ഒക്ടോബർ പകുതിവരെയെങ്കിലും മഴ തുടരാനിടയുണ്ട്. ബംഗാൾ ഉൾക്കടലിൽ ന്യൂനമർദമോ ചുഴലിക്കാറ്റോ രൂപമെടുത്താൽ കേരളം ഉൾപ്പെടെയുള്ള തെക്കേ ഇന്ത്യൻ സംസ്ഥാനങ്ങളിൽ മഴ ശക്തമാകും.

ജൂൺ ഒന്നു മുതൽ സെപ്‌തംബർ 23 വരെ സംസ്ഥാനത്ത് ലഭിക്കേണ്ടതിനെക്കാൾ 13 ശതമാനം മഴ കുറഞ്ഞതായി കാലാവസ്ഥാ വകുപ്പ് അറിയിച്ചു. 1957 മില്ലീ മീറ്റർ ലഭിക്കേണ്ടയിടത്ത് 1709 മില്ലീമീറ്റർ മഴ കിട്ടി. ആലപ്പുഴ, എറണാകുളം, ഇടുക്കി, വയനാട് ജില്ലകളിൽ മഴകുറഞ്ഞപ്പോൾ ബാക്കി 10 ജില്ലകളിലും നല്ലതോതിൽ മഴ ലഭിച്ചു. കണ്ണൂരിലാണ് ഏറ്റവും കൂടുതൽ മഴകിട്ടിയത്, 15 ശതമാനം അധികം.

അടുത്ത രണ്ട് മണിക്കൂറിൽ കേരളത്തിലെ കാസർകോഡ് ജില്ലയിൽ ഒറ്റപ്പെട്ടയിടങ്ങളിൽ ഇടത്തരം മഴയ്ക്കും (5-15 mm/hour) മണിക്കൂറിൽ 40 കിലോമീറ്റർ വരെ വേഗതയിൽ വീശിയേക്കാവുന്ന ശക്തമായ കാറ്റിനും, തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, മലപ്പുറം, കോഴിക്കോട്, വയനാട്, കണ്ണൂർ ജില്ലകളിൽ ഒറ്റപ്പെട്ടയിടങ്ങളിൽ നേരിയ/ഇടത്തരം മഴയ്ക്കും സാദ്ധ്യതയുണ്ടെന്ന് കേന്ദ്ര കാലാവസ്ഥവകുപ്പ് അറിയിച്ചു.