എം.മോഹൻ വി​ട പറഞ്ഞു

കൊച്ചി: വിടപറയും മുമ്പേ, ശാലിനി എന്റെ കൂട്ടുകാരി,​​ ഇസബെല്ല,​ മുഖം,​ പക്ഷേ… തുടങ്ങി ഒരുപിടി മികച്ച ചിത്രങ്ങളിലൂടെ മലയാള സി​നി​മയി​ൽ മുഖമുദ്ര ചാർത്തിയ സംവിധായകൻ എം. മോഹൻ (76) വിടവാങ്ങി. ഇന്നലെ രാവി​ലെ 9.45ന് എറണാകുളം മെഡി​ക്കൽ ട്രസ്റ്റ് ആശുപത്രി​യി​ലാണ് അന്ത്യം. മസ്തിഷ്‌കാഘാതത്തെ തുടർന്ന് ഒരു വർഷത്തിലേറെയായി ചികിത്സയിലായിരുന്നു.

ഭൗതികദേഹം എറണാകുളം ചെറി​യ കടവന്ത്ര കസ്തൂർബാ നഗറി​ലെ സത്യാഞ്ജലി വീട്ടി​ൽ. സംസ്കാരം ഇന്ന് 12ന് രവി​പുരം ശ്മശാനത്തി​ൽ. ‘രണ്ടു പെൺകുട്ടികൾ” എന്ന മോഹന്റെ ആദ്യകാല സിനിമയിലെ നായിക അനുപമയാണ് ഭാര്യ. മക്കൾ: ചെന്നൈയിൽ വ്യവസായിയായ പുരന്ദർ മോഹൻ, എറണാകുളത്ത് റസ്റ്റോറന്റ് ഉടമയായ ഉപേന്ദർ മോഹൻ. മരുമകൾ: അൻഷു പുരന്ദർ.

80കളിൽ മലയാള സി​നി​മയി​ൽ നവഭാവുകത്വത്തിന് തുടക്കം കുറിച്ചവരിൽ പ്രമുഖനാണ് മോഹൻ. ആദ്യചിത്രം വാടകവീട് (1978). 23 ചിത്രങ്ങൾ സംവിധാനം ചെയ്തു. പലതിനും തിരക്കഥയെഴുതിയത് ജോൺ പോളാണ്.

മുഖം, ആലോലം, വിടപറയും മുമ്പേ തുടങ്ങി 13 സിനിമകൾക്ക് തിരക്കഥയും രണ്ട് സിനിമകൾക്ക് കഥയുമെഴുതി. രണ്ട് ചിത്രങ്ങൾ നിർമ്മിച്ചു. നെടുമുടി വേണു നായകനായ വിടപറയും മുമ്പേ സൂപ്പർഹിറ്റായിരുന്നു. ഇടവേളയി​ലൂടെയാണ് ഇടവേള ബാബു സി​നി​മയി​ലെത്തി​യത്.

പ്രമുഖ സംവിധായകൻ പി. വേണുവിന്റെ സഹായിയായി 1971ലാണ് മോഹന്റെ സിനിമാപ്രവേശം. എ.ബി. രാജ്, എ.വിൻസെന്റ്, മധു, ഹരി​ഹരൻ എന്നിവരുടെയും സഹായിയായി. പത്മരാജന്റെ കഥയിൽ കൊച്ചു കൊച്ചു തെറ്റുകൾ, ശാലിനി എന്റെ കൂട്ടുകാരി, ഇടവേള എന്നിവ ചെയ്തു. നാ​ല് ടെ​ലി​​​ഫി​​​ലി​​​മു​​​കൾ സം​വി​​​ധാ​നം ചെ​യ്തു. സി​നി​മാ അ​നു​​​ഭ​​​വ​​​ങ്ങൾ കോർ​ത്തി​​​ണ​​​ക്കി​ ര​ണ്ട് പു​സ്ത​​​ക​​​ങ്ങളും എ​ഴു​​​തിയിട്ടുണ്ട്.