പൗർണ്ണമിക്കാവിൽ ഞായറാഴ്ച നട തുറക്കും

തിരുവനന്തപുരം: വിഴിഞ്ഞം വെങ്ങാനൂർ പൗർണ്ണമിക്കാവ് ശ്രീ ബാല ത്രിപുരസുന്ദരി ദേവി ക്ഷേത്രത്തിൽ പൗർണ്ണമിയായ ഞായറാഴ്ച നട തുറക്കും. ആദിഗുരുവായ ശിവൻ സപ്തർഷികൾക്ക് യോഗ പകർന്നതിന്റെ ഓർമ്മപ്പെടുത്തലായ ഗുരുപൂർണ്ണിമയും അന്നാണ്.

മലയാളിയും ശ്രീരാമകൃഷ്ണ ആശ്രമങ്ങളുടെ മഠാധിപതിയുമായ സ്വാമി സ്വപ്രഭാനന്ദ ഗുരുപൂർണ്ണിമയ്ക്ക് മുഖ്യകാർമ്മികത്വം വഹിക്കും. നിരവധി മഠാധിപതിമാർ പങ്കെടുക്കും. കായംകുളം സനാതന ആദ്ധ്യാത്മിക പഠന കളരിയുടെ രാമായണമാസ കലാപരിപാടികൾ അന്ന് രാവിലെ അരങ്ങേറും.

രാവിലെ 11ന് തിരുവനന്തപുരം ശിവദം ഗ്രൂപ്പിന്റെ തിരുവാതിര, 12ന് കുന്നമ്പുഴ തത്വമസി ഭജൻസിന്റെ ഭജനാമൃതം, രണ്ടിന് മംഗലത്തുകോണം ചിലമ്പിന്റെ തിരുവാതിര, 3ന് കല്ലിയൂർ ത്രയംബക നൃത്തസംഘത്തിന്റെ തിരുവാതിര, 4.30ന് കുവൈറ്റിലെ തംബുരുവും പൗർണ്ണമിക്കാവ് ക്ഷേത്രവും ചേർന്ന് നടത്തുന്ന അമ്പതിൽപ്പരം വീണാവാദകരുടെ വൈണികാർച്ചന, 6.15ന് സ്വാതി തിരുനാൾ സംഗീത കോളേജിലെ അസി. പ്രൊഫസർ ലേഖ തങ്കച്ചിയുടെ മോഹിനിയാട്ടം, 7.15ന് അരികത്ത് ദേവിക്ഷേത്രം മാതൃസമിതിയുടെ ഭജനാമൃതവും തിരുവാതിരയും 8.15ന് തിരുവനന്തപുരം നാട്യദർപ്പണയുടെ നൃത്തനൃത്ത്യങ്ങൾ എന്നിവയും നടക്കും. ശനിദോഷമുള്ളവർക്ക് ശനീശ്വരന്റെ നടയിൽ പൂജ ചെയ്യാം. പുലർച്ചെ 4.30 മുതൽ രാത്രി 10 വരെ നട തുറന്നിരിക്കുമെന്ന് ക്ഷേത്രം ഭാരവാഹികൾ അറിയിച്ചു.


Source link