കൊരട്ടിയിൽ വീട് കുത്തിപ്പൊളിച്ച് 35 പവൻ കവർന്നു

കൊരട്ടി: ചിറങ്ങരയിൽ വീട് കുത്തിത്തുറന്ന് 35 പവന്റെ സ്വർണാഭരണം മോഷ്ടിച്ചു. ചിറങ്ങര ചെമ്പകശ്ശേരി പ്രകാശന്റെ വീട്ടിൽ നിന്ന് ഞായറാഴ്ച അർദ്ധരാത്രിയോടെയാണ് 35 പവന്റെ സ്വർണാഭരണങ്ങളും എണ്ണായിരം രൂപയും കളവ് പോയത്. വീടിന്റെ പിൻഭാഗത്തെ ജനൽക്കമ്പി പൊളിച്ചാണ് മോഷ്ടാക്കൾ അകത്തുകടന്നത്.
അലമാരയിൽ ചോറ്റുപാത്രത്തിലിട്ട് സഞ്ചിയിലാക്കി വച്ചിരുന്നതാണ് ആഭരണങ്ങൾ. ജനൽക്കമ്പി പൊളിക്കാൻ ഉപയോഗിച്ച ഇരുമ്പിന്റെ പിക്കാസ് സ്ഥലത്ത് നിന്ന് കണ്ടെത്തി. തൊട്ടടുത്ത് വീട് നിർമ്മാണം നടക്കുന്നിടത്ത് നിന്നുമെടുത്തതാണ് പിക്കാസ്.

ചാലക്കുടി ഡിവൈ.എസ്.പി ആർ.അശോകന്റെ നേതൃത്വത്തിൽ അന്വേഷണം തുടങ്ങി.

റിട്ട. റെയിൽവേ ഉദ്യോഗസ്ഥനായ പ്രകാശൻ രണ്ട് ദിവസത്തെ യാത്രയ്ക്ക് ശേഷം ഞായറാഴ്ച വൈകിട്ട് മൂന്നിനാണ് വീട്ടിലെത്തിയത്. ക്ഷീണത്താൽ ഇരുവരും നേരത്തെ ഉറങ്ങാൻ കിടന്നു. മറ്റാരും വീട്ടിലുണ്ടായിരുന്നില്ല. വീടിന്റെ മുകളിലെ നിലയിൽ വാടകയ്ക്ക് താമസിക്കുന്ന സ്ത്രീയും മോഷണത്തെക്കുറിച്ച് അറിഞ്ഞിരുന്നില്ല. ഇവരുടെ വാതിലും കുത്തിത്തുറക്കാൻ ശ്രമിച്ചിട്ടുണ്ട്.