സർക്കാരിനോട് മനുഷ്യാവകാശ കമ്മിഷൻ: പൊലീസിലെ ആത്മഹത്യ തടയാൻ അംഗബലം കൂട്ടണം
തിരുവനന്തപുരം: ജോലി സമ്മർദ്ദം കാരണമുള്ള ആത്മഹത്യകൾ വർദ്ധിക്കുന്ന സാഹചര്യത്തിൽ പൊലീസ് സ്റ്റേഷനുകളിലെ അംഗബലം പുതിയ സാഹചര്യങ്ങൾക്കനുസരിച്ച് പരിഷ്‌കരിക്കണമെന്ന് മനുഷ്യാവകാശ കമ്മിഷൻ. പൊലീസ് മേധാവിക്കാണ് കമ്മിഷൻ ആക്ടിംഗ് ചെയർപേഴ്സണും ജുഡിഷ്യൽ അംഗവുമായ കെ.ബൈജൂനാഥ് നിർദ്ദേശം നൽകിയത്.
അംഗബലം കുറവായതിനാൽ പൊലീസുദ്യോഗസ്ഥർക്ക് വിശ്രമവും പ്രതിവാര അവധിയും ലഭിക്കാത്തതു കാരണം മാനസിക സമ്മർദ്ദം കൂടിവരുന്നതായുള്ള റിപ്പോർട്ടുകൾ ശ്രദ്ധയിൽപ്പെട്ടിട്ടുണ്ടെന്ന് ഉത്തരവിൽ പറയുന്നു. സ്വയം വിരമിക്കാൻ അപേക്ഷ നൽകുന്നവരുടെ എണ്ണവും കൂടി വരികയാണ്. പല സ്റ്റേഷനുകളിലും മതിയായ അംഗബലം ഇല്ലാത്തതിനാൽ ക്രമസമാധാന പരിപാലനം യഥാവിധി നടക്കുന്നില്ലെന്ന പരാതിയുണ്ട്.
സ്റ്റേഷൻ പരിധിയിലെ ജനസാന്ദ്രതയ്‌ക്കനുസരിച്ച് അംഗബലം പരിഷ്‌കരിച്ചാലേ ചുമതലകൾ സമയബന്ധിതമായി നിർവഹിക്കാൻ കഴിയുകയുള്ളൂ. വി.ഐ.പി ഡ്യൂട്ടിക്ക് പൊലീസുദ്യോഗസ്ഥർ പോകുമ്പോൾ സ്റ്റേഷനിലെ ക്രമസമാധാന കാര്യങ്ങൾ അവതാളത്തിലാകുന്നതായി പരാതിയുണ്ടെന്നും കമ്മിഷൻ ഉത്തരവിൽ പറഞ്ഞു. മനുഷ്യാവകാശ പ്രവർത്തകനായ രാഗം റഹിം സമർപ്പിച്ച പരാതിയിലാണ് നടപടി.
Source link
