ബാർബഡോസ്: 2024 ട്വന്‍റി 20 ക്രിക്കറ്റ് ലോകകപ്പിൽ സൂപ്പർ ഓവറിലേക്കു നീണ്ട ആദ്യ മത്സരത്തിൽ ഒമാനെതിരേ നമീബിയയ്ക്കു ജയം. ഗ്രൂപ്പ് ബിയിൽ ചെറിയ സ്കോർ കണ്ട മത്സരത്തിൽ അവസാന പന്തിൽ വരെ ആവേശം നിറച്ചാണു സൂപ്പർ ഓവറിലേക്കു നീണ്ടത്. 110 റണ്‍സ് വിജയലക്ഷ്യം പിന്തുടർന്ന് ബാറ്റിംഗിനിറങ്ങിയ നമീബിയ 109 റണ്‍സിൽ ഒതുങ്ങിയതോടെയാണ് മത്സരം സൂപ്പർ ഓവറിലേക്കു കടന്നത്. സൂപ്പർ ഓവറിൽ ആദ്യം ബാറ്റ് ചെയ്ത നമീബിയയ്ക്കായി ഡേവിഡ് വീസും ക്യാപ്റ്റൻ ജെർഹാർഡ് എറാസ്മസും ചേർന്ന് 21 റണ്‍സ് അടിച്ചെടുത്തു. ബൗളിംഗിലും തിളങ്ങിയ വീസ് 10 റണ്‍സ് മാത്രമാണു വിട്ടുകൊടുത്തത്. നമീബിയയ്ക്ക് 11 റണ്‍സ് ജയം. മൂന്നു വിക്കറ്റ് നേടിയ വീസാണു കളിയിലെ താരം. ടോസ് നേടിയ നമീബിയ ഫീൽഡിംഗ് തെരഞ്ഞെടുക്കുകയായിരുന്നു. 19.4 ഓവറിൽ 109 റണ്‍സിന് ഓൾഔട്ടായെങ്കിലും മികച്ച ബൗളിംഗ് പ്രകടനം പുറത്തെടുത്ത ഒമാൻ വിജയത്തിന്‍റെ വക്കിൽനിന്നാണു മത്സരം കൈവിട്ടത്. അവസാന ഓവറിൽ ജയിക്കാൻ അഞ്ചു റണ്‍സ് വേണ്ടിയിരുന്ന നമീബിയക്ക് മെഹ്റാൻ ഖാൻ എറിഞ്ഞ ഓവറിൽ നാലു റണ്‍സ് മാത്രമാണു നേടാനായത്. യാൻ ഫ്രൈലിങ്കിനെയും സെയ്ൻ ഗ്രീനിനെയും പുറത്താക്കി മെഹ്റാൻ അവസാന ഓവറിൽ ഒമാനെ വിജയത്തിലെത്തിക്കുമെന്നു തോന്നിച്ചിരുന്നു. എന്നാൽ, അവസാന പന്തിൽ നമീബിയയ്ക്കു ജയിക്കാൻ രണ്ടു റണ്‍സ് വേണമെന്നിരിക്കേ വിക്കറ്റ് കീപ്പർ നസീം ഖുഷി വരുത്തിയ പിഴവാണു മത്സരം ടൈ ആക്കിയത്. മൂന്ന് ഓവർ എറിഞ്ഞ മെഹ്റാൻ വെറും ഏഴു റണ്‍സ് മാത്രം വിട്ടുകൊടുത്ത് മൂന്നു വിക്കറ്റ് വീഴ്ത്തി. 48 പന്തിൽനിന്ന് 45 റണ്‍സെടുത്ത ഫ്രൈലിങ്കാണു നമീബിയയുടെ ടോപ് സ്കോറർ. 31 പന്തിൽനിന്ന് 24 റണ്‍സെടുത്ത നിക്കോളാസ് ഡാവിനും ഭേദപ്പെട്ട പ്രകടനം നടത്തി. ടോസ് നഷ്ടപ്പെട്ട് ബാറ്റിംഗിനിറങ്ങേണ്ടിവന്ന ഒമാനെ നമീബിയ 19.4 ഓവറിൽ 109 റണ്‍സിനു പുറത്താക്കിയിരുന്നു. നാല് ഓവറിൽ വെറും 21 റണ്‍സ് മാത്രം വഴങ്ങി നാലു വിക്കറ്റ് വീഴ്ത്തിയ റൂബൻ ട്രംപൽമാനാണ് ഒമാനെ തകർത്തത്. ഡേവിഡ് വീസ് മൂന്നു വിക്കറ്റ് വീഴ്ത്തി. ബാറ്റിംഗ് ദുഷ്കരമായ പിച്ചിൽ 39 പന്തിൽ നിന്ന് 34 റണ്‍സെടുത്ത ഖാലിദ് കയ്‌ലാണ് ഒമാന്‍റെ ടോപ് സ്കോറർ. ഖാലിദിനെ കൂടാതെ സീഷാൻ മക്സൂദ് (20 പന്തിൽ 22), അയാൻ ഖാൻ (21 പന്തിൽ 15), ഷക്കീൽ അഹമ്മദ് (ഒന്പത് പന്തിൽ 11) എന്നിവരും രണ്ടക്കം കടന്നു.
Source link
സൂപ്പർ നമീബിയ
