അസാധാരണ തിരിച്ചുവരവ് ; കൊവിഡിന് മുമ്പുള്ളതിനെക്കാൾ വൻ വർദ്ധനവ്,​ സർവകാല റെക്കോഡിട്ട് കേരളം

തിരുവനന്തപുരം:വിനോദസഞ്ചാരികളുടെ വരവിൽ സർവകാല റെക്കോർഡിട്ട് കേരളം. മഹാമാരിയുടെ കാലത്തെ വെല്ലുവിളികൾക്കുശേഷം കേരളം ടൂറിസം രംഗത്ത് അസാധാരണമായ തിരിച്ചുവരവ് നടത്തിയെന്ന് മന്ത്രി മുഹമ്മദ് റിയാസ് ഫേസ്ബുക്കിൽ പങ്കുവച്ച കുറിപ്പിൽ വ്യക്തമാക്കി കൊവിഡിന് മുമ്പുള്ള കണക്കുകളെ മറികടന്ന് 2023-ൽ, 2.25 കോടിയിലധികം വിനോദസഞ്ചാരികളുടെ വരവാണ് രേഖപ്പെടുത്തിയിട്ടുള്ളത്. 2021 നെ അപേക്ഷിച്ച് 2022ൽ, സന്ദര്‍ശകരുടെ വരവില്‍ ഇരട്ടിയിലധികം വര്‍ദ്ധനവാണ്‌ ഉണ്ടായിട്ടുള്ളത്.

2022 നെ അപേക്ഷിച്ച് 17% വർദ്ധനവോടെ 2023 ലും ട്രെൻഡ് തുടർന്നു. ഈ കണക്കുകൾ കേരളത്തിൻ്റെ അഭിവൃദ്ധി പ്രാപിക്കുന്ന ടൂറിസം വ്യവസായത്തിൻ്റെ യഥാർത്ഥ കഥ പറയുന്നുവെന്നും മുഹമ്മദ് റിയാസ് പറഞ്ഞു. 2020ലെ കൊവിഡ് ലോക്ക് ഡൗണിൽ വിനോദ സഞ്ചാരികളുടെ വരവിൽ 72.77 ശതമാനം കുറഞ്ഞിരുന്നു. എന്നാൽ 2021ൽ 42.56 ശതമാനം വർദ്ധിച്ചു.

21,871,641 ആഭ്യന്തര വിനോദസഞ്ചാരികളും 649,057 വിദേശ സഞ്ചാരികളുമാണ് കഴിഞ്ഞ വർഷം സംസ്ഥാനത്തെത്തിയത്. ആഭ്യന്തര വിനോദ സഞ്ചാരികളുടെ വരവിൽ സർവകാല റെക്കോർഡാണ് സംസ്ഥാനം സ്വന്തമാക്കിയത്. 2021ൽ 75,37,617 ആഭ്യന്തര വിനോദസഞ്ചാരികളിൽ നിന്ന് 2023ൽ 1,88,67,414 ആയി ഉയർന്നു. കൊവിഡിന് മുമ്പുള്ള 1,83,84,233 എന്ന ഏറ്റവും ഉയർന്ന സന്ദർശകരുടെ റെക്കോർഡിനേക്കാൾ കൂടുതലാണിത്.