ഗംഭീര മേക്കോവറിൽ ആസിഫ് അലി; ജീത്തു ജോസഫ് അവതരിപ്പിക്കുന്ന ‘ലെവെൽ ക്രോസ്’

സൂപ്പർഹിറ്റ് ചിത്രങ്ങളുടെ അമരക്കാരൻ ജീത്തു ജോസഫ് പ്രേക്ഷകർക്ക് മുന്നിൽ അവതരിപ്പിക്കുന്ന പുതിയ ചിത്രത്തിൽ നായകന്മാരായി അസിഫ് അലിയും ഷറഫുദീനും എത്തുന്നു. അമല പോൾ ആണ് നായികാ വേഷത്തിലെത്തുന്നത്. ‘ലെവെൽ ക്രോസ്’ എന്നു പേരിട്ടിരിക്കുന്ന ചിത്രം ജീത്തു ജോസഫിന്റെ സംവിധാന സഹായിമാരിൽ ഒരാളായ അർഫാസ് അയൂബ് ആണ് സംവിധാനം ചെയ്യുന്നത്. നടന്‍ ആദം അയൂബിന്റെ മകനാണ് അർഫാസ്.
അച്ഛനൊപ്പമായിരുന്നു അർഫാസിന്റെ സിനിമാ പഠനം ആരംഭിക്കുന്നത്. സംവിധാനത്തിലും തിരക്കഥാരചനയും പരിചയിച്ച് ആദത്തിന്റെ തന്നെ ടെലിഫിലിമുകളിലും സംവിധാന സംരംഭങ്ങളിലും അസിസ്റ്റ് ചെയ്തു. ശേഷം മുംബൈയിലെത്തിയ അർഫാസ്  ഹിന്ദി സിനിമാ ലോകത്താണ് തുടക്കമിടുന്നത്. വിക്രം ഭട്ടിന്റെ ഒരു ഹൊറർ മൂവിയിൽ അസോഷ്യേറ്റ് ഡയറക്ടറായി തുടങ്ങിയ അർഫാസ് ബോളിവുഡ് സിനിമകൾ ചെയ്ത് തുടരുമ്പോഴാണ് ജീത്തു ജോസഫ് ‘ദ് ബോഡി’ എന്ന ബോളിവുഡ് ചിത്രത്തിനായി മുംബൈയിലെത്തുന്നതും തുടർന്ന് അദ്ദേഹത്തോട് സഹകരിച്ച് ‌ജീത്തുവിന്റെ അസോഷ്യേറ്റായി മാറുന്നതും.

ദൃശ്യം 2വിന്റെ സെറ്റിൽ സതീഷ് കുറുപ്പിനും ജീത്തു ജോസഫിനും മോഹൻലാലിനുമൊപ്പം അർഫാസ്

ജീത്തുവുമൊന്നിച്ച് ദൃശ്യം2 , റാം, ദൃശ്യം2ന്റെ തെലുങ്ക് പതിപ്പ് എന്നിവകളിൽ ചീഫ് അസോഷ്യേറ്റായി വർക്ക് ചെയ്തു. മോഹൻലാൽ സംവിധാനം ചെയ്യുന്ന ബറോസിന്റെ അസോഷ്യേറ്റ് സംവിധായകനും അർഫാസ് തന്നെയാണ്. ട്വൽത് മാന്‍, കൂമൻ എന്നീ സിനിമകളിലും ജീത്തുവിനൊപ്പം ഉണ്ടായിരുന്നു.

അർഫാസിന്റെ ആദ്യ സിനിമയായ ‘ലെവെൽ ക്രോസി’ൽ ഞെട്ടിക്കുന്ന മേക്കോവറിലാണ് ആസിഫ് അലി എത്തുന്നത്. പരുക്കൻ ലുക്കിലെത്തുന്ന ആസിഫ് തന്നെയാണ് ഫസ്റ്റ്ലുക്ക് പോസ്റ്ററിന്റെ പ്രധാന ആകർഷണം.

രമേശ്‌ പിള്ളയും സുധൻ സുന്ദരവുമാണ് ചിത്രം നിർമിച്ചിരിക്കുന്നത്. പാഷൻ സ്റ്റുഡിയോസിന്റെയും അഭിഷേക് ഫിലിംസിന്റെയും ബാനറിലാണ് ചിത്രം ഒരുങ്ങുന്നത്. റാം എന്ന ബിഗ് ബജറ്റ് മോഹൻലാൽ സിനിമയുടെ നിർമാതാക്കളും ഇവർ തന്നെയാണ്. 
അപ്പു പ്രഭാകർ ആണ് ചായാഗ്രഹണം നിർവ്വഹിക്കുന്നത്. ആദം അയൂബ് സംഭാഷണം ഒരുക്കുന്നു. പ്രേം നവാസ് ആണ് പ്രൊഡക്‌ഷൻ ഡിസൈനെർ. സംഗീതം വിശാൽ ചന്ദ്രശേഖർ.

English Summary:
Asif Ali joining again with Jeethu Joseph for Arfaz Ayub debut movie