ഗോള്‍ഡന്‍ ത്രെഡ്‌സിന് തകര്‍പ്പന്‍ ജയം
കൊച്ചി: കേരള പ്രീമിയര്‍ ലീഗില്‍ നിലവിലെ ചാമ്പ്യന്‍മാരായ ഗോള്‍ഡന്‍ ത്രെഡ്‌സ് എഫ്‌സിക്ക് തകര്‍പ്പന്‍ ജയം. എറണാകുളം മഹാരാജാസ് കോളജ് ഗ്രൗണ്ടില്‍ നടന്ന രണ്ടാം മത്സരത്തില്‍ ഡോണ്‍ ബോസ്‌കോ എഫ്എയെ അഞ്ച് ഗോളിന് തോല്‍പ്പിച്ചു. അജയ് അലക്‌സ്, ക്രൈസ്റ്റ് ഒദ്രാഗോ, അജാത് സഹീം, കെ.എസ്. അബ്ദുള്ള, ഇ.എസ്. സജീഷ് എന്നിവരാണ് ഗോളടിച്ചത്. ആദ്യ കളിയില്‍ കേരള പോലീസിനോടു തോറ്റെങ്കിലും ആത്മവിശ്വാസത്തോടെയാണ് ഗോള്‍ഡന്‍ ത്രെഡ്‌സ് എഫ്‌സി ഡോണ്‍ബോസ്‌കോ എഫ്എയ്‌ക്കെതിരേ ഇറങ്ങിയത്. 24ാം മിനിറ്റില്‍ പെനല്‍റ്റിയിലൂടെ ഗോള്‍ഡന്‍ ത്രെഡ്‌സ് മുന്നിലെത്തി. ക്യാപ്റ്റന്‍ അജയ് അലക്‌സിന്‍റെ തകര്‍പ്പന്‍ കിക്ക് വലതുളച്ചു. 42ാം മിനിറ്റില്‍ ക്രൈസ്റ്റ് ഔദ്രാഗോ മിന്നുന്ന ഫ്രീ കിക്കിലൂടെ ത്രെഡ്‌സിന്‍റെ നേട്ടം രണ്ടാക്കി.
രണ്ടാംപകുതിയില്‍ 50ാം മിനിറ്റില്‍ പെനല്‍റ്റിയിലൂടെ മൂന്നാം ഗോള്‍ നേടി. മധ്യനിര താരം അജാത് സഹീം ആണ് പെനല്‍റ്റിയിലൂടെ ഗോള്‍ നേടിയത്. കളിയുടെ അവസാന ഘട്ടത്തിലായിരുന്ന രണ്ട് ഗോളുകളും. അബ്ദുള്ളയും, സജീഷും ലക്ഷ്യം കണ്ടു. ഇഞ്ചുറി ടൈമില്‍ ജോണ്‍ ചിഡിയുടെ പെനല്‍റ്റി ഗോള്‍ കീപ്പര്‍ ശബരിദാസ് തടഞ്ഞു. ജനുവരി 22ന് കേരള എഫ്‌സിക്കെതിരേയാണ് ഗോള്‍ഡന്‍ ത്രെഡ്‌സിന്‍റെ മൂന്നാം മത്സരം.
Source link
